अर्घ्य

 वेदनेची गाठ सुटू दे, भावनेचा शब्द फुटू दे, 

तुझिया स्मरणात माझे, अंतरीचे झाड फुलू दे। 

धडपडीला साद मिळू दे, फक्त पाठी थाप असू दे, 

जाई क्षितिजा पार ऐसी वेगळाली वाट दिसू दे। 

हा उन्हाचा दाह शमू दे, श्रावणाच्या सरी पडू दे, 

सावलीला आणि इलुसा, स्वप्न भरला गाव रमू दे। 

निर्झरांचा संग असू दे, प्रीत वेडी साथ जुळू दे, 

भागण्या तृष्णा जीवाची ओंजळींचे दान मिळू दे। 

जीवनाचा अर्थ कळू दे, नित्य भोळा भाव वसू दे, 

अर्घ्य व्हावी ईश्वराला, ऐसी देहयात्रा घडू दे । 

 - डॉ अतिंद्र सरवडीकर